Nun hai sentíu que pueda competir coles sensaciones que mos pue provocar un golor y ye que de los cinco sentíos colos que percibimos la realidá, l'olfatu ye'l sentíu con más memoria que tien el ser humanu.
Esto sábelo bien Aitana, que mos visitó esti xueves 12 pa falanos del so llibru “Los niños de humo”, un llibru d’histories entrellazaes (como la propia autora mos comentó) alrodiu d’un carbón prieto que yá nun suelta fumu pero sí memoria. Son pallabres escrites n’alcordanza daquellos neños que dexaron de selo en cuantes viaxaron al centru la tierra pa escargata-y les coraes y facer del so trabayu una parte mui importante de la nuestra historia. Xente de la que se sabía d’ónde yeren ensin falta dicilo porque “Todo el mundo lo sabía. ¿Por qué? Porque su ropa olía a humo”
Magar la distancia que puen marcar los medios tecnolóxicos (les circunstancies obliguen a ello) y les dificultaes “del directo”, nada d’ello consiguió estropiar esti alcuentru de l’autora col alumnáu. Foi un acercamientu divertíu y tienru nel que l’autora-yos recordaba lo importante de mantener encesa la nuestra historia recuperando y recoyendo histories, y lleendo; y lo necesaries que son les biblioteques y llibreries cercanes nesti llabor.
Aitana, esperamos contar contigo pa falanos del to trabayu nuevu “Carboneras”, que sabemos va salir el próximu llunes 23 y que presentes el vienres 27 nel Cine Ideal de Ciañu. Hasta entós, namás mos queda una pregunta pendiente: ¿dalguna vez fuisti a estrenar un “abrigu blancu”?
Gracies pola to paciencia y les ganes que pones contando histories.
Comentarios